|
|
Zuvernsovver en schuldovver (4: 1- 5:26)
|
Leviticus 04
01De HEER zee tegen Mozes:
02"Zeg tegen Isrelieten: 'Sums zundegt ain nait mit opzet tegen ain van de HEER zien geboden en dut e wat dat nait mag, zunder dat e t wil.
03As priester dij zaalfd is, zo'n misstap dut en zo schuld over t volk brengt, mout e as zuvernsovver de HEER n bol zunder lek of brek aanbaiden.
04Hai mout bol noar ingang van soamenkomsttènt tou brengen en doar, veur de HEER, haand op t daaier zien kop leggen en hom slachten.
05Den mout e wat van bol zien bloud pakken, doar mit in soamenkomsttènt goan,
06zien vinger in t bloud stippen en doar, veur de HEER, zeuven moal t gedien dij veur haailege roemte hangt, mit besprenkeln.
07Hai strikt ook wat bloud aan hoorns van t altoar veur reukovvers dij in soamenkomsttènt staait, dicht bie de HEER. Wat ter nog van t bloud overbleven is, mout e oetgaiten aan vout van t altoar veur brandovvers dij bie ingang van soamenkomsttènt staait.
08Ale vet van bol dij as zuvernsovver aanboden wordt, mout e vothoalen: t vet rondom ingewanden en ale netvet,
09baaide nieren mit nierongels bie lennens en lutjeste kwaab van lever, dij e mit nieren en aal vothoalen mout.
10 Dat mout e vothoalen, krekt as ook doan wordt bie t koubaist veur t vree-ovver. Priester dut dit aalmoal op t altoar veur brandovvers in rook opgoan.
11 Mor bol zien hoed en ale vlaais mouten, net as kop, poten, ingewanden mit mis en aal,
12 boeten legerkaamp brocht worden, noar t stee tou doar aask van ovvers stört wordt. Doar, op dij zuvere stee, mout dat aalmoal opbraand worden op n holtvuur.
13 As haile gemainschop zunder t te besevven, zundegt tegen ain van de HEER zien geboden en nait mit opzet wat doan het dat nait mag,
14 mout t volk, zo gaauw as ze besevven wat of ze misdoan hebben, n bol aanbaiden as zuvernsovver. Bol mout noar soamenkomsttènt brocht worden,
15 en doar, veur de HEER, mouten oldsten van t volk haand op t daaier zien kop leggen en hom slachten.
16 Den mout priester dij zaalfd is wat van bol zien bloud pakken en doar mit in soamenkomsttènt goan,
17 zien vinger in t bloud stippen en doar, veur de HEER, zeuven moal t gedien mit besprenkeln.
18 Hai strikt ook wat bloud aan hoorns van t altoar dij in soamenkomsttènt staait, dicht bie de HEER. Wat ter nog van t bloud overbleven is, gut e oet aan vout van t altoar veur brandovvers, dij bie ingang van soamenkomsttènt staait.
19 Ale vet mout e vothoalen en op t altoar in rook opgoan loaten.
20 Hai mout bol op aigenste menaaier ovvern as bol van zien aigen zuvernsovver. Zo zel priester verzoenen veur heur doun en kriegen ze vergeven.
21 Wat of ter van bol overbleven is, mout boeten legerkaamp brocht worden en doar opbraand, krekt as bie ovver van priester dij zaalfd is. Zo heurt t zuvernsovver veur gemainschop brocht te worden.
22 As n veurman van t volk nait mit opzet zundegt tegen ain van geboden van de HEER, zien God, en zo schuld over zok brengt deur wat te doun dat nait mag, mout e,
23 zo gaauw as e beseft wat e misdoan het, n bok zunder lek of brek ovvern.
24 Hai mout haand op t daaier zien kop leggen en t slachten veur de HEER, op aigenste stee, doar daaiern veur t brandovver slacht worden. Zo is t n zuvernsovver.
25 Priester strikt den mit vinger wat bloud van t ovverdaaier aan hoorns van t altoar veur brandovvers. Wat of ter van t bloud overbleven is, gut e oet aan vout van t altoar.
26 Ale vet mout hai op t altoar in rook opgoan loaten, krekt as doan wordt mit t vet van vree-ovver. Zo dut priester verzoenen veur veurman van t volk veur wat e misdoan het, en krigt dij vergeven.
27 As ain aans van t volk nait mit opzet zundegt tegen ain van de HEER zien geboden en schuld over zok brengt deur wat te doun wat nait mag,
28 mout e, zo gaauw as e beseft wat e misdoan het, as zuvernsovver n bok aanbaiden zunder lek of brek.
29 Hai mout haand op t daaier zien kop leggen en hom slachten op t stee doar daaiern veur t brandovver slacht worden.
30 Priester strikt den mit vinger wat bloud van t ovverdaaier aan hoorns van t altoar veur brandovvers. Wat of ter van t bloud overbleven is, gut e oet aan vout van t altoar.
31 Ale vet mout e vothoalen, krekt as ook doan wordt mit t vet van vree-ovver, en hai mout t op t altoar in rook opgoan loaten as n lekker roekende goave doar de HEER nocht aan het. Zo zel priester verzoenen doun veur dij persoon en krigt e vergeven.
32 Dij n schoap as zuvernsovver aanbudt, mout n ooi nemen zunder lek of brek.
33 Hai mout haand op t daaier zien kop leggen en hom as zuvernsovver slachten op t stee doar daaiern veur t brandovver slacht worden.
34 Priester strikt den wat bloud van t ovverdaaier aan hoorns van t altoar veur brandovvers. Wat ter van t bloud overbleven is, gut e oet aan vout van t altoar.
35 Ale vet mout e vothoalen, krekt as dat doan wordt mit t vet van schoap veur t vree-ovver. Hai mout dat op t altoar in rook opgoan loaten, mit aal aander ovvergoaven veur de HEER. Zo zel priester verzoenen doun veur dij persoon en krigt e vergeven.
|
Leviticus 05
01As ain n vervluiken heurt en doar getuge van is omdat hai t zain het of omdat hai t wait, mor der niks van zegt, dij moakt zok strafboar.
02Of as ain verget dat e wat onzuvers aanwèst het, zo as t kedoaver van n wild of mak daaier of t kedoaver van n kroepdaaier, en doar onzuver deur blift, den brengt e schuld over zok.
03Krekt as ain dij t ontschoten is dat e wat van n mensk aanwèst het dat onzuver is, wat dat den ook mor wezen mag,
04of dij verget dat e n aid sworen het doar e nait bie noadocht het, of t nou n goie was of n minne of wat veurent den ook mor.
05Dij persoon mout, zo gaauw as e zok van zien schuld bewust wordt, opbiechten wat of e misdoan het,
06en de HEER hier as vergouden veur zunde dij e doan het, n daaier as zuvernsovver aanbaiden. t Mout n schoap of n bok wezen, in elks gevaal n wiefke. Priester zel veur hom verzoenen doun.
07Dij gain schoap of bok betoalen kin, mout as vergouden twij törreldoeven of twij jonge gewone doeven aan de HEER ovvern: ain as zuvernsovver en ain as brandovver.
08Hai mout ze noar priester brengen, en dij brengt eerst doef dij as zuvernsovver bedould is noar t altoar. Priester mout t daaier achteraan bie nek kop ofkniepen, mor hai mag hom der nait haildaal oftrekken.
09Den mout e wat bloud van t ovverdaaier tegen ziedkanten van t altoar aan sprenkeln, en wat ter van t bloud overbleven is, mout e oetlekken loaten aan vout van t altoar. Zo is t n zuvernsovver.
10 Twijde doef mout e, zo as t veurschreven is, as brandovver opdroagen. Zo dut priester verzoenen veur dij persoon en krigt e vergeven.
11 Dij gain twij törreldoeven of twij jonge gewone doeven het, mout as zuvernsovver veur wat e misdoan het, n tiende efa bloum van waait aanbaiden. Der mag gain eulie overhèn goten worden en gain wierook bie doan: t is ja n zuvernsovver.
12 Waaitenbloum wordt noar priester brocht en dij pakt ter n haandvol van, of was t ovvergoave haildaal, en let dat mit aal aander ovvergoaven veur de HEER op t altoar in rook opgoan. Zo is t n zuvernsovver.
13 Zo dut priester verzoenen veur dij persoon veur wat of e misdoan het en krigt e vergeven. Wat overblift, is veur priester, krekt as bie t koornovver.'"
14 De HEER zee tegen Mozes:
15 "As ain zok nait mit opzet vergript aan haailege dingen van de HEER, mout e as vergouden n ram zunder lek of brek as schuldovver aan de HEER aanbaiden. Weerde van t daaier mout vaststeld worden in zulvern sjekels, zo as dat in t haailegdom gebruuk is bie schuldovvers.
16 Dat wat de HEER zienent is en onthaailegd wordt, mout vergoud worden. Dij persoon mout wat of t weerd is aan priester betoalen, en der nog n viefde over tou doun. Priester zel ram ovvern en veur dij persoon verzoenen doun. Hai krigt den vergeven.
17 Dij zunder dat e t wait, zundegt tegen ain van de HEER zien geboden en schuld over zok brengt deur wat te doun wat nait mag, is strafboar.
18 As schuldovver mout e n ram noar priester brengen, zunder lek of brek, krekt zoveul weerd as t bedrag dat vaststeld is. Den zel priester verzoenen veur hom doun veur wat e, nait mit opzet en zunder dat e t wait, misdoan het en krigt e vergeven.
19 Zo is t n schuldovver: hai het zok ja schuldeg moakt veur de HEER."
20 De HEER zee tegen Mozes:
21 "Dij zundegt en n overtreden tegen de HEER begaait, omreden hai ontkent dat n volksgenoot hom wat aanvertraauwd het dat e veur hom in bewoar nemen zol, of hom wat laind het, ofschoon dat aal zo is, brengt schuld over zok. As e ontkent dat e wat stolen het en t is aal zo, of aanderman ofzet,
22 of wat vonden het dat n aander verloren het, en hai zegt van nait, en doar n vaalze aid op dut,
23 brengt schuld over zok. Hai mout t stolen goud, t geld dat e ofzet het, of wat hom aanvertraauwd is, of wat aander verloren het, of wat hai zok ook mor mit n vaalze aid perbaaierde tou te aigen, volsloagen vergouden.
24 Op dag dat e zien schuldovver brengt, mout e aigender der boetendes n viefde overhèn betoalen.
25 As vergouden veur de HEER mout e as schuldovver n ram noar priester brengen, zunder lek of brek. Weerde van t daaier mout vaststeld worden in zulvern sjekels, zo as dat in t haailegdom gebruuk is.
26 Den zel priester veur de HEER verzoenen veur hom doun veur dat, doar hai zok aan schuldeg moakt het en krigt e vergeven."
|
|
